Roma je nastavila niz bez poraza u Seriji A koji traje još od 15. decembra prošle godine – sinoć je u gradskom derbiju remizirala sa Laciom rezultatom 1:1.
Lacio je poveo početkom drugog poluvremena, golom Alesija Romanjolija, bivšeg igrača „vučice“, koji je u 49. minutu pogodio za 1:0. Ipak, Roma je uspjela da izjednači – Matijas Soule je majstorskim pogotkom u 69. minutu postavio konačan rezultat i donio svom timu vrijedan bod.
U dresu Lacija cijeli meč odigrao je crnogorski reprezentativac Adam Marušić, dok su oba tima prikazala borbenu i disciplinovanu igru u derbiju punom naboja.
Lacio je ovim remijem zadržao dva boda prednosti u odnosu na Romu, ali je propustio priliku da se bodovno poravna sa Juventusom na četvrtom mjestu koje vodi u Ligu šampiona.
