Odluka o izgradnji postrojenja za prečišćavanje otpadnih voda u Botunu, i pored višegodišnjeg otpora lokalnog stanovništva i ranijih najava o traženju nove lokacije, donijeta je kako tvrdi odbornik DPS-a Vladan Arsović, iza zatvorenih vrata, na sastanku sa ambasadorom EU kojem su prisustvovali Milan Knežević, Milojko Spajić i Andrija Mandić. Prema njegovim riječima, Knežević je uprkos javnom protivljenju dao prećutno “zeleno svjetlo” uz poruku “završavajte posao”.
Arsović tvrdi da je prelomni trenutak nastupio pod snažnim političkim pritiskom, kako međunarodnim, tako i unutar vladajuće koalicije, te da je odluka motivisana spašavanjem političkog rejtinga. Ukazuje i na nalaze Zavoda za hidrometeorologiju i seizmologiju iz jula, prema kojima voda ispod uliva postojećeg postrojenja ne ispunjava ekološke standarde, sivo-žuta boja, neprijatan miris, pjena, otpad i prekoračenja ključnih parametara jasno pokazuju hitnost projekta.
Podsjeća da je za vrijeme DPS vlasti u Glavnom gradu, završena kompletna priprema za izgradnju kolektora vrijednog preko 50 miliona eura, dok nova gradska vlast, prema njegovoj ocjeni, u dvije godine nije napravila pomak, već je projekat pretvorila u “poligon za dnevnopolitičke igre”.
Uprkos svemu, konačna odluka da se kolektor gradi u Botunu znači završetak višemjesečne političke i javne drame. Kako poručuje Arsović, time će se riješiti jedan od najvećih ekoloških problema Podgorice i Zete, iako ostaje otvoreno pitanje, ko je iz ove političke trgovine izašao kao najveći pobjednik.
ETOportal / V.M.